Gobierno Vasco

Guraso agurgarriak,


Aurreko kasturteetan bezala zuen seme-alabak Elorrioko Institutuan eskolaratu dituzuen familiei ongi etorria eman nahi dizuet bai berrian berri zatozenei eta baita gurekin urte batzuk daramatzazuenei ere. Ongi etorria eta esker ona azaldu nahi dizuet gure Hezkuntza Komunitate osoaren izenean Euskal Eskola Publikoak hemen Elorrion duen eskaintzaren alde egin duzuen hautuagatik eta jarraitzen dugu gogoratzen Hezkuntza Komunitatea denok osatzen dugula eta zuen seme-alaben hezkuntza eta heziketa guztion lana dela, guztiok, modu orekatu eta koordinatuan jokatuz aurrera eraman beharko dugun bizitza-egitasmoa dela.

Aurten ere gure ikasleriak modu orekatuan, integratzailean eta solidarioan Institutuak dituen zeregin guztietan partehartzea bultzatu nahi dugu.  

Aldarrikapen batzuk, zoritxarrez, oraindik indarrean jarraitzen dute eta 2017-2018.ikasturte honen atarian bergogoratu nahi dizkizuet:

1. LOMCE legeari EZ, orain artekoa ez duelako hobetzen eta kalte baino ez diolako egingo gure Hezkuntza Sistemari.

2. Irakasleen ordezkapenak Euskal Eskola Publikoan lehen egunetik bertatik behar ditugu.

3. Eragileei eta alderdiei Eskola Publikoaren aldeko apustu garbia egin dezaten eskatzen diegu

Ikasturte honetako erronkak ere ez dira gutxi izango eta batzuk azpimarratzera jarrita, labur-labur esanda, hauetan arituko dira:   

  • HAUSPOA proiektuak bere 5. ikasturtea beteko du aurten. Gure ikastetxeko Hezkuntza Komunitateak aurrera egin dezan nahi du eta gure eskuetan dagoen guztia jarriko dugu hasi berri dugun ikasturte honetan ere HAUSPOA proiektua arrakastatsua izan dadin. Gidan ikusgai duzue 2017-2018.ikasturterako prestatu dugun egitura eta eskaintza. Proiektu hau sendotzeko gurasoak behar beharrezkoak zarete eta zuen partehartze aktiboa eskatzen dizuet. Norbait animatuko da tailerren bat eskaintzen? Espero zaituztegu!!    
  • IKT IKASTETXE EREDUAREN proiektuarekin aurrera darraigu, paperaren mundutik mundu digitalera urratsa ematen jarraitu nahi dugu. Urratsez urrats eta aurrera begira hartu behar ditugun erabakiak guztion artean adostuz.    
  • ELEANIZTASUNERANTZ proiektuan jarraitzen dugu eta frantsesaren eta alemanaren aldeko apostua mantenduz, ingelesez hainbat irakasgai eskaintzen ari gara, batzuk ikasle guztientzat direnak eta beste batzuk ikasleek/familiek aukeratzen dituztenak. IKASTETXEKO HIZKUNTZA PROIEKTUA IRAKURKETA PLANA barneratuz joango gara
  • HEZKIDETZA eta BIZIKIDETZA egitasmoa oso garrantzitsua da eta izan behar da guztiontzat. Elkarbizitza parekidea eta osasuntsua lortzea da gure helburua.
  • LAN KOOPERATIBOA (IK/KI)metodologian ere beste urrats bat aurrera eman nahi dugu. Metodologia hau erabiliko duen irakasle kopurua handitu nahi dugu eta baita ekipo-planak bideratu. Metodologia honen hedatze-fasean sartu gara eta hainbat ikasgela modu berezian hornitu ditugu.       

Proiektu honetaz gain, Elorrioko Institutuak, HEZKUNTZA PROIEKTUAn oinarrituta, egitasmo hauek buruan egingo du lan:

1. Hezkuntzaren eta heziketaran kudeaketarako dauden teknologia berrietan oinarrituta ikastetxea bera, bere osotasunean, heldutasun maila handiago batera eraman nahi dugu. Ikasturte honetan MAILA AURRERATUA lortu nahi dugu.

2. Sare desberdinetan parte hartzen jarraituko dugu: HNP (Hizkuntza Normalkuntzarako Proiektua), EA 21 (Eskola Agenda 21 sostenigarritasunarekin lotuta), KH (Kalitatea Hezkuntzan), Hezkidetza Mintegia, Eleaniztasunerantz…

3.   PARTEKATUTAKO TUTORETZA proiektuarekin ere aurrera darraigu. Ikasle guztiei begira, Tutoretza lana irakasle guztion lana dela aldarrikatuz eta Tutoretza lanaren garrantzia azpimarratuz. Institutuko irakasleok, guztiok, gara ikasleen tutore . Familia guztiokin egon nahi dugu gutxienez 3 aldiz ikasturtean zehar eta lehenengo hartu-emana aurrez aurrekoa izaten ahalginduko gara nahiz eta ondorengo elkarrizketak zein eratara emango diren familia eta tutorearen artean adostuko diren.  

4.   Eleaniztasunaren aldeko apostuaren barruan, aurten ere, ikasleekin ahozkotasuna lantzeko ELKARRIZKETA LAGUNTZAILEA izango dugu gurekin urritik aurrera.  Hauspoa proiektuan ere parte hartuko du.

5.  Hezkuntza Komunitateak onartutako HEZKUNTZA PROIEKTUA berrikusten hasiko gara.

6.    Berdinen arteko tutoretzak ere abian jarri nahi ditugu: ikasle nagusiagoak, ikasle sartu berrien tutore izatea. Hastapenetan gaude.

7.  “Aberaste curricularra” proiektuari ere hasiera emango diogu aurtengo ikasturtean. Hiru ikasturteetarako den proiektua da.     

8. Azken ikasturteetan bezala, aurten ere 4.DBHko ikasleekin ELKARTRUKE EUROPEARRA aurrera eramango dugu. Aurrekoetatik ikasita, aurten gure asmoa ikasleak PEINE (Alemania) herriko IGS Peine ikastetxe integraleko ikasleekin eta UBBERGEN (Holanda) herriko Stichting Sint Augustinus Havo Notre Dame des Anges ikastetxeko ikasleekin trukaketa burutzea da. 

9.  Berritasunen artean Granadako GUADIX herriko ACCI Institutuarekin eta gure DBH2ko ikasleekin egin nahi dugun elkartrukea azpimarragarria da. Aurreko ikasturtean ez zen posible izan eta aurten eskaintza hau indartzeko ahaleginak egingo ditugu.  

10. Aniztasunari erantzuna emateko Desberdintze Curricularreko taldea (DC) 2 ikasturterako lortu dugu eta hainbat mailetan, ikasgaitan eta geletan 2 irakasle izango dira gelan aldi berean. Ikasleei begirako errefortzu saioak indartu ditugu.  

11.  Elorrioko Udaleko agintariekin epe ertainerako prozesua zabaldu nahi dugu, bai eraikuntzaren gabeziei aurrera nola egin aztertzeko eta baita Institutuak aurrera eraman nahi dituen hainbat proiektutan ere euren partehartzea lortzeko. 

12.  Irakaskuntza Publikoaren nortasun irudia lantzen jarraitzen dugu.  

 

Ikasturte berezia izango da niretzat 2017-2018 hau. Ikasturte honen bukaeran zuzendari izateari utziko diot 16 ikasturte eta gero. Bide luze honetan ilusioa eta ahalegina jarri dugu guztiok eta bidean asko ikasi dut inolako zalantzarik gabe. Sarrera agur hau, bukaera agurra ere badenez, nire esker ona adierazi nahi dizuet guztioi: urte guzti hauetan eskuz esku lanean aritu izan garen irakasle eta ez-irakasle guztiei, ikasle izan direnei eta direnei eta nola ez Institutuko familiei. Zuen laguntza eta babesa izan dut eta aurten ere horrela izango delakoan nago. Eskerrik asko, benetan eta bihotzez!!     

Gurasoentzat eta Elorrioko herriarentzat ikastetxe irekia izatea nahi dugu, gure Institutua eraikitzearen ardura Hezkuntza Komunitate osoarena dela jakinda eta gu zuen seme/alaben heziketan bidelagun baino ez garela. Familien inplikazioa ezinbestekoa dugu guztiok nahi ditugun helburuak lortzeko.

Eskerrik asko eta zuen iritzien eta hobekuntzen zain geratzen gatzaizkizue. Aurrera eta ekin diezaiogun bideari!!!

 

     Josu Etxaburu

Elorrio Institutuko zuzendaria

 

 

© Elorrio BHI
Telefonoa: 946582713 | Fax: 946582713 | idazkari@elorrioinstitutua.eus